Kryeministri Edi Rama i shprehu sot kancelares gjermane mbështetjen e madhe dhe simpatinë që gëzon Gjermania dhe veçanërisht kombëtarja gjermane në mesin e shqiptarëve.
Në fjalën e tij në forumin ekonomik që u mbajt në "Tirana Biznes Park", Rama theksoi se “kur Gjermania fiton kampionatet ka më shumë shqiptarë të gëzuar sesa kur socialistët fitojnë zgjedhjet”.
Kryeministri solli në vëmendje ndeshjen e famshme mes kombëtares gjermane dhe asaj shqiptare në vitin 1983, për të thënë se kur gjermanëve ju duhej një gol për t’u kualifikuar, dhe arritën të shënonin, shqiptarët u gëzuan më shumë sesa kur humbi kombëtarja jonë.
“Në vitin 1983 kur luhej një ndeshje e famshme mes kombëtares tonë dhe tuajës, dhe juve gjermanëve ju duhej një fitore për të kaluar më tutje, shqiptarët u hodhën nga gëzimi kur shënuan gol gjermanët”, tha Rama.
Kryeministri falënderoi kancelarin gjermane për vizitën, duke thënë se, “ajo i qëndroi premtimit dhe erdhi në Shqipëri pavarësisht se nuk do t’ju keqkuptonte kush nëse do ta shtynit vizitën që ka tërhequr vëmendjen e mbarë botës”.
