Kampionia në fuqi në volejboll për meshkuj e nis mbarë rrugëtimin drejt fronit.
Studenti fitoi mbrëmjen e djeshme finalen e parë derbi ndaj Tiranës me rezultatin 3-1, e luajtur në pallatin e sportit "Asllan Rusi". Pas një maratone më shumë se dy orë, festa i takoi Studentit, edhe pse janë në lojë dhe katër finale nga epilogu i edicionit të 70-të kombëtar.
Ndeshja nis e ekuilibruar, por katër pikë nga shërbimi i Martiros (nga më të mirët për Studentin) i japin shkëputjen ekipit 9-5. Pushim për Tiranën që vlen mjaft, pasi Pepa është spektakolar me serinë në bllok ndaj Ivanov e Trokës duke ngushtuar në 14-12. Më pas stafeta kalon për Studentin, lideri i të cilit, Troka, e ka shumë të lehtë të finalizojë nga shërbimi. Fundi i këtij seti është dramatik 22-20, 23-23. Një bllok i dyshes Malaj-Troka ndaj Ramës i jep fitoren 26-24.
Emocionues edhe seti i dytë. Ekuilibër deri në pikën e 5-të dhe më tej janë bardheblutë e teknikut Koja që shkëputen 8- 11 falë lojës perfekte të kapitenit Ferhati. Bllok i Lundrës ndaj Memisë. Sakaq, Kasa tregon klasin. Është Memia që vë gjithçka në baraspeshë, ndërsa Kasa përmbys 12-11. Tekniku Koja sinjalizon pushim, pas të cilit Tirana rikthehet më e freskët, ku bie në sy shpërthimi i Ferhatit që u jep fitoren të tijve 25-23. Më pas finalja nuk ka histori. Një formalitet për kampionët përballë një rivali të çoroditur. Tirana udhëheq bindshëm 15-9, 18-13 sërish me protagonist Trokën dhe Studenti fiton lehtësisht 25-17. Seti i katërt nis me superioritetin e Tiranës 4-1, 8-3. Po përvoja e Studentit nuk shpërdoron.
Bllok i Trokës ndaj Ferhatit. Një tjetër finalizim i saktë i Trokës dhe 12-12. I vlefshëm edhe kontributi i Ivanov, ndërsa në radhët e Tiranës shfaqen shenja tensioni. Ivanov vulos nga shërbimi 16-14. Malaj arkivon një bllok model ndaj Ferhatit dhe Studenti udhëheq 20-17. "Show"-n e Trokës, Çalit dhe liberos Gorenxa e vulos Martiro me Studentin që fitoi 25-19 dhe krejt ndeshjen 3-1.
Me këtë sukses të parë, Studenti është tashmë një hap më pranë fitimit të titullit, duke u konfirmuar të paktën për momentin si skuadra më e fortë në vend. Sot është radha e femrave, mes Barleti Volej dhe Tiranës, me finalen e parë në orën 19:00 po në "Asllan Rusi".
Studenti-Tirana 3-1 (1-0)
(25-23, 23-25, 25-17, 25-19)
STUDENTI: Kono, Qerraxhija, Tukseferi, Çali, Martiro, Troka, Ivanov, Malaj, Memia, Kasa, Muça, Gorenxa (L). Trajner: Ylli Tomorri
TIRANA: A.Lundra, Xhabrahimi, Kula, Arapi, Kupi, Rama, Pepa, Xhija, Ndoni, Batalli, Ferhati, Kasemi (L). Trajner: Ilia Koja
GJYQTARË: K.Gjoka, E.Zguri
ANËSORË: A.Nurja, R.Ekmekçiu, E.Papamihali, A.Brokaj
Përgatiti: OLGERT SERANI
