Teuta ka mbërritur dje në Austri dhe është akomoduar në një nga hotelet e Salzburgut, ku edhe do të zhvillojë fazën përgatitore në kuadër të ndeshjeve të Ligës së Europës.
Por në listën e skuadrës ka rënë në sy edhe një afrim i ri. Serbi Tarik Çmajçanin do të zhvillojë një provë në ekipin e drejtuar nga Julian Ahmataj.
Mesfushori me tipare sulmuese ka luajtur fillimisht te skuadra e Novi Pazar, ku edhe ka nisur karrierën dhe më pas është transferuar në Sindeliç, për një sezon futbollistik.
21-vjeçari gjithashtu ka luajtur për një sezon futbollistik tek ekipi i Balestier Khalsa në Aingapor, ku ka bërë një paraqitje të mirë në 26 ndeshje.
Duke parë ekipet ku ka luajtur, por edhe moshën e re, drejtuesit kanë vendosur që lojtari të jetë në provë dhe të shihet më nga afër gjendja e tij në miqësoret që skuadra do të luajë.
Më pas do të jetë trajneri Ahmataj ai që do të vendosë nëse futbollisti do të firmosë kontratë për sezonin e ardhshëm. Sa u takon përgatitjeve, ato pritet të nisin me ngarkesë të lartë, duke qenë se koha në dispozicion është e shkurtër deri në ndeshjen e parë të Ligës së Europës.
Jeton Rexhmati
