Ndeshja miqësore mes Austrisë së Vjenës dhe Teutës, e cila përfundoi 7-2, dyshohet se është e trukuar. Lajmin e kanë bërë të ditur mediat austriake, të cilat raportojnë me hollësi atë që ka ndodhur në datën 21 qershor dhe thonë se ekipi shqiptar është i përfshirë në këtë skandal.
Foto nga ndeshja miqësore e datës 21 qershor mes Teutës dhe Austrisë së Vjenës
Portali i njohur "news.at" shkruan me hollësi atë që ka ndodhur dhe raporton se prokuroria e këtij vendi ka nisur një hetim duke shkuar në hotelin në të cilin qëndronte Teuta.
Policia ka marrë në pyetje zyrtarët e klubit dhe futbollistë të ndryshëm. Në publikimin e lajmit bëhen me dije emrat e 3 lojtarëve, të cilët kanë dhënë intervista për policinë. Këta të fundit kanë kërkuar edhe telefonat celularë për të parë komunikimet që ka pasur skuadra e Teutës gjatë atyre ditëve.
Ndërkohë, një tjetër gazetë e njohur austriake, "Kurier", ka publikuar edhe emrat e tre futbollistëve që janë marrë në pyetje nga hetuesit. Bledian Rizvani, Shpëtim Moçka dhe Rustem Hoxha janë lojtarët që janë pyetur për të hedhur dritë mbi ndeshjen Austria e Vjenës- Teuta.
Investigimi
Ja çfarë shkruhet në lajmin e pasqyruar nga portali i njohur dhe serioz "news.at": "Sytë e tifozëve të futbollit janë të drejtuara prej disa javësh në kampionatin europian në Francë, ndërsa skuadra të ndryshme zhvillojnë fazën përgatitore dhe kanë program të përcaktuar për të qenë sa më në formë për kampionatin e ardhshëm. Në Austri ka pasur shumë skuadra, të cilat kanë zhvilluar këtu ndeshje miqësore dhe kanë përfituar për të bërë edhe biznes. Shembulli tipik është klubi shqiptar Teuta, i Durrësit.
Këta të fundit bënë dy ndeshje miqësore, ndaj Riedit humbën 1-0, ndërsa ndaj Austrisë së Vjenës humbën 7-2. Në pamje të parë duket një rezultat i padëmshëm, sepse ndeshja është thjesht miqësore. Katër ditë pas ndeshjes, hetuesit kanë dërguar në hotelin ku qëndronte Teuta disa oficerë policie në emër të prokurorisë.
Teuta dyshohet se ka manipuluar këtë takim për llogari të mafies së basteve. Trajnerët, zyrtarët dhe lojtarët kanë dhënë dëshmitë e tyre, por janë detyruar të dorëzojnë edhe telefonat celularë. Klubet austriake nuk janë përfshirë në këtë skandal, pasi rrjeti është goditur prej kohësh, por trukimet e ndeshjeve vazhdojnë të bëhen nga skuadrat e tjera".
E shkuara
Hetuesit austriakë kishin goditur rrjetin e basteve në vitin 2013, kur skuadra e sulmuesit Sanel Kuljiç fiksonte ndeshje. Nga hetimi i mëparshëm u dënuan me burg dy shqiptarë, të cilët kishin manipuluar ndeshjet duke marrë urdhra edhe nga mafia e bixhozit dhe basteve.
Shqipëria është duke u goditur prej disa vitesh nga ky rrjet dhe diçka të tillë e dëshmon edhe pezullimi i Skënderbeut nga garat europiane.
Në rastin e Teutës, ka pasur një bashkëpunim shumë të mirë mes vëzhguesit zviceran "Sportradar" që ka kapur lëvizje të parregullta të koeficientëve të basteve edhe në ndeshjen kundër Riedit.
Në dukje ishte një sfidë, e cila përfundoi 1-0 dhe nuk të lë hije dyshimi, por sipas atyre që merren me lëvizjen e koeficientëve dhe analizës së shumave të parave të luajtura për një ndeshje normale futbolli, kishte hije dyshimi.
Nisur nga ky fakt, ndeshja kundër Austrisë së Vjenës u vu në fokus të hetuesve, të cilët kanë ndjekur nga afër jo vetëm lëvizjet e koeficientëve, por edhe sjelljen e futbollistëve në fushën e lojës.
Të dyshuarit do të hetohen për mashtrim sportiv në përgjithësi. Një skandal që ka tërhequr vëmendjen maksimale të gazetave serioze austriake që e kanë pasqyruar dje gjatë të gjithë ditës.
