Goli i 500-të në karrierë nuk e ka shpëtuar Lionel Mesin nga akuzat. Tifozët e Barcelonës nuk e kanë pëlqyer aspak ecurinë e tij në javët e fundit dhe disa prej tyre janë treguar të guximshëm duke ia thënë diçka të tillë në përfundimin e ndeshjes ndaj Valencias.
Në fakt, të dielën Barcelona zhvilloi një ndeshje pozitive, por fati nuk ishte me skuadrën dhe futbollistët. Ata provuan me çdo mënyrë për të marrë pikë në këtë sfidë, por fati nuk ishte me ta.
Akuzat- Disa prej tifozëve të Barcelonës kishin vendosur të prisnin të gjithë lojtarët kur largoheshin nga stadiumi. Disa ishin aty për t'i përshëndetur, ndërsa të tjerë për t'i këshilluar. Kishte edhe nga ata fansa të katalanasve që kanë akuzuar disa futbollistë kryesorë të skuadrës si Lionel Mesin.
Në momentin kur argjentinasi doli me makinën e tij për t'u larguar nga stadiumi, njëri prej tifozëve filloi ta akuzonte duke lënë të kuptohej se impenjimi i tij në fushën e lojës nuk ishte maksimal. "Leo, fillo të vraposh më shumë në fushën e lojës.
Mos vrapo tani që je duke ikur për në shtëpi", i tha tifozi, ndërsa të tjerët e përkrahën duke bërtitur në drejtim të Mesit. Forma e dobët që po kalon lojtari në javët e fundit duket shqetësuese dhe sa herë ai nuk është mirë, edhe Barcelona e ka të vështirë të fitojë.
Me 3 humbjet radhazi në kampionat, katalanasit e kanë ndërlikuar shumë situatën e tyre për titullin dhe tani duhet t'i fitojnë të gjitha sfidat për të triumfuar në La Liga. Atletiko dhe Reali janë duke pritur që Barcelona të bëjë një tjetër hap fals për t'i rrëmbyer kreun, pavarësisht se Mesi dhe të tjerët nuk kanë ndër mend të bëjnë një nga çmenduritë më të mëdha të viteve të fundit në futboll. Ndoshta, pas akuzave nga tifozët, ai do të nisë të vrapojë më shumë në fushë.
