TIRANË, 26 Tetor/ATSH-Arbi Fortuzi/-.Avokati i Popullit Igli Totozani ka kërkuar që ligji për lustracionin të nis nga institucioni që ai drejton.
Përmes një deklaratë për shtyp, AP, Totozani ka theksuar se institucioni që ai drejton kërkon kryerjen e një procesi paraprak transparent të hapjes së dosjeve.
Në deklaratën e tij, Totozani duke theksuar se AP ka qenë mjaft aktiv sa i takon ligjit të lustracionit, konfirmon se vijon të mbetet vigjilent në lidhje me fatin e këtij ligji. "Për këtë qëllim, bëri të ditur Totozani, pak ditë më parë i jemi drejtuar Kryeministrit, Kuvendit të Shqipërisë dhe Ministrisë së Drejtësisë me dy rekomandime (Dy Rekomandimet per Lustracionin) të reja për Lustracionin. I pari, lidhet me dëshirën dhe vullnetin tonë për ta nisur Lustracionin pikërisht nga institucioni i Avokatit të Popullit. Kemi kërkuar, sqarohet në njoftim, të jemi të parët që të japim shembullin konkret në zbatimin e këtij procesi. Për këtë kemi propozuar ndryshimet ligjore specifike që duhet të pësojë ligji për Avokatin e Popullit, me qëllim që të mundësojë aplikimin real të Lustracionit në organizimin dhe veprimtarinë e brendshme organizative, funksionale të vet institucionit".
"Në rekomandim, tha Totozani, theksojmë se: Në "Kushtet për t'u zgjedhur Avokat i Popullit", të shtohet kriteri i pastërtisë së figurës, që i referohet arsyeve të mjaftueshme, të besueshme, për përjashtimin e kandidaturave për Avokat Populli, që mund të paraqesin rrezik real për të drejtat e njeriut dhe demokracinë. Ky kriter vjen në përputhje me standardin sipas të cilit, lustracioni si proces aplikohet për funksione të caktuara shtetërore që kanë përgjegjësi reale për hartimin, ose zbatimin e politikave të qeverisë dhe praktikave që lidhen me sigurinë e brendshme, ose funksione të caktuara shtetërore që mund të urdhërojnë dhe/ose kryejnë abuzime me të drejtat e njeriut", tha ai.
Sipas tij, një vlerësim i njëjtë vlen edhe për shtesën e kritereve për "Kushtet për t'u zgjedhur komisioner". "Propozojmë gjithashtu që për rekrutimin e kandidatëve që konkurojnë për të qenë pjesë e personelit të të Avokatit të Popullit, apo edhe të parashikimeve për përfundimin e marrëdhënieve të punës në shërbimin civil, të përcaktohen disa kritere që vijnë në të njëjtën logjikë me vendimin e Gjykatës Kushtetuese për këtë cështje. Këto kritere duhet të shtohen në dispozitat me karakter përgjithësues, në Ligjin "Për nëpunësin civil", pasi nuk janë pjesë e ligjit "Për Avokatin e Popullit", vijoi Totozani.
AP sqaroi dhe rekomandimin e dytë. "Në funksion të zbatimit të Lustracionit në institucionet e tjera kemi dërguar një tjetër rekomandim, ku kërkojmë rregullimin horizontal ligjor në të gjithë kuadrin ligjor ekzistues në fuqi. Vetëm kështu, theksoi Totozani, do të mund të rregullohet proceduralisht dhe institucionalisht ky proces purifikimi për shoqërinë shqiptare, mbështetur në standarded më të mira ndërkombëtare"
"Ky rregullim ligjor duhet të prekë procedurat dhe kërkesat e rekrutimit, si dhe të ndërprerjes së marrëdhënies së punës të nëpunësve civilë në administratën publike, të përfaqësuesve të pushtetit gjyqësor, të organit të prokurorisë, pa përjashtuar këtu zgjedhjen, apo ndërprerjen e mandatit të funksionarëve të lartë publikë, sipas standardeve dhe kritereve kushtetuese dhe ndërkombëtare. Po kështu, rregullimi ligjor duhet të përfshijë objektivitetin e propozimeve dhe vendimmarrjen respektive për dhënie dekoratash, tituj nderi, medaljesh dhe titujve vendorë të nderit, nga ana e organeve shtetërore që kanë këtë të drejtë", tha Totozani.
Ai mbylli fjalën duke thënë se AP vlerëson se është momenti i duhur që procesi i Lustracionit, të bëhet bashkë me Dekriminalizimin, dhe Reformën në Drejtësi për t'i garantuar Shqipërisë dhe demokracisë së saj, një stad të ri dhe një të ardhme më të sigurtë. /a.g/
