U rrezua ne kanionin e Erzenit rinisin kerkimet per 18-vjecarin

Mëngjesin e sotëm rinisën kërkimet për gjetjen e 18-vjeçarit Erjon Alizoti, ekskursionistit të rrëzuar mesditën e djeshme në kanionet e Erzenit, 200 metra nga Shpella e Pëllumbasit. Operacioni i kërkimeve nga forcat RENEA dhe palombarët, u ndërpre për shkak errësirës rreth orës 20:00.

Dyshohet se i riu mund të ketë rrëshqitur aksidentalisht nga bregu i lumit, teksa po lante duart. Ai ishte i shoqëruar me një bashkëmoshatar tjetër, edhe ai i rrëmbyer nga rrjedha e lumit, por ai mundi të shpëtohej nga pjesëtarët e tjerë të grupit.

I riu bashkë me grupin mbi 50 veta ishin organizuar në rrjetin social “Facebook” për të zhvilluar një ekskursion në kanionet e Erzenit, pas malit të Dajtit.
Policia njoftoi se do të procedojë penalisht organizatorët e ekskursionit për mos krijimin e kushteve të sigurisë e grupit të të rinjve.