Ajo konsiderohet si një nga objektet më me vlera në qytetin muze të Beratit. Ura e Goricës, e quajtur si eleganca e bardhë që ndodhet mbi lumin Osum, është shpallur monument kulture e kategorisë së parë për vlerat që mbart dhe si e tillë ruhet nga shteti. Vitet e fundit, ura e Goricës, është lënë krejtësisht pas dore si pasojë e mungesës së investimeve, por një investim i akorduar nga Fondi Shqiptar i Zhvillimit do të bëjë të mundur restaurimin e saj.
Restaurimi i kësaj ure me vlerë të madhe kulturore është menduar që të nisë këtë muaj. Restaurimi do të mundësojë që objekti të konservojë vlerat e papërsëritshme, duke mos i cenuar ato, por edhe të jetë një objekt i vizitueshëm për të gjithë turistët vendas dhe të huaj. Janë rreth 130 mijë dollarë, të cilat janë akorduar për restaurimin e kësaj ure, punimet në të cilën pritet të nisin shumë shpejt. Drejtori i Drejtorisë Rajonale Kombëtare të Kulturës në Berat, Eugen Kallfani shprehet optimistë për këtë iniciativë. “Jemi në fazën përfundimtare të procedurave dhe me një financim të Fondit të Zhvillimit, me projekt të hartuar nga specialistë të DRKK-së Berat është mundësuar ky investim që parashikon restaurimin e këtij monumenti të rëndësishëm, i cili në ditët tona vjen në gjendje shumë të amortizuar”, thotë Kallfani.
Punimet do të bëhen për; eliminimin e linjave ekzistuese, eliminimin e linjës ekzistuese në krahun lindor të urës dhe eliminimin e rrjetit të ujësjellësit. Restaurimi i kalldrëmeve ekzistuese në trupin e urës së Goricës është një tjetër punim i parashikuar për këtë restaurim, sistemi i ndriçimit, si ai në trupin e urës dhe ai profesional me spote projektuese në qemerët e urës. “Gjithashtu parashikohet dhe vendosja e dy tabelave informuese në skajin verior dhe jugor për turistët, eliminimi i të gjitha mbetjeve inerte të cilat prej vitesh të tëra kanë mbuluar këmbëzat e urës”, thotë Kallfani për “KultPlus”. Ura e Goricës është një monument kulture i kategorisë së parë, shumë i rëndësishëm për Qendrën Historike të Beratit. Ura është ndërtuar që në shekullin XVIII. Ajo ka qenë fillimisht prej druri. Më pas, në vitin 1780, në kohën e Ahmet Kurt Pashës ajo u ndërtuar me gurë. Sipas dokumentacioneve të shkruara arkivore, ura pësoi një rindërtim thuajse të plotë gjatë viteve 1920-30.
