Vellezerit Aliko refuzojne ushqimin ne polici Jemi ne agjerim

Dy vëllezërit Arbjon dhe Alban Aliko, të akuzuarit kryesorë për vrasjen e efektivit të RENEA­s në Lazarat ndodhen në Drejtorinë e Policisë së kryeqytetit në pritje për të dhënë dëshminë e tyre rreth ngjarjes, edhe pse nga pyetja paraprake ata kanë mohuar akuzat e ngritura ndaj tyre.

Me agjërim dhe në gjendje të rënduar psikologjike, por edhe fizike, dy vëllezërit Aliko nuk kanë dhënë ende një dëshmi zyrtare me procesverbal para grupit hetimor.

Ata kanë refuzuar ushqimin e Policisë së Tiranës, nisur edhe nga fakti se janë duke agjëruar. Pas takimit me avokatin e tyre, Neshat Fana, i kanë bërë të ditur se ata nuk kanë asnjë lidhje me ngjarjen e Lazaratit dhe nuk janë autorë të vrasjes së efektivit të RENEA­-s, Ibrahim Basha. Burime nga Policia e Tiranës thanë se ata janë marrë në pyetje shkurtimisht rreth orës 19:45, pasi nuk kanë qenë në gjendje të flasin.

Prova më e rëndësishme që mund t’i implikojë ose jo në këtë ngjarje është arma e krimit, e cila nuk është gjetur ende nga Policia.