Venizelos viziton sot Kosoven

Zv.kryeministri dhe ministri i Punëve të Jashtme të Greqisë, Evangelos Venizelos viziton sot Prishtinën, ku do të takohet me kryeministrin e Kosovës, Hashim Thaçin, dhe pritet të diskutohet për integrimin e Kosovës drejt BE-së. Nuk dihet nëse objekt i bisedës do të jetë apo jo njohja e Kosovës, pasi Greqia njihet si një nga pesë vendet anëtare të BE-së, e cila nuk e ka njohur pavarësinë e Kosovës.

Ndërkohë, dje Venizelos vizitoi Serbinë ku u takua me kryeministrin serb Ivica Daçiç. Ai përgëzoi Serbinë për lidershipin dhe kurajon e treguar në dialogun me Kosovën, dhe tha se Kosova dhe i gjithë rajoni ka perspektivë të qartë evropiane, dhe Greqia e mbështet një gjë të tillë.

Venizelos u shpreh se nisja e negociatave për anëtarësimin në BE me Serbinë do të jetë kyçe për stabilitetin në Ballkanin Perëndimor, dhe shprehur kënaqësi për nisjen e tyre më 21 janar, gjatë presidencës greke të BE-së.

Daçiç dhe Venizelos u shprehën se Serbia dhe Greqia kanë marrëdhënie të afërta, dhe kreu i qeverisë serbe e cilësoi Greqinë si “ndoshta mikun më të madh në BE”, duke shprehur falënderim për mirëkuptimin nga ana e Athinës dhe mbështetjen e dhënë për Beogradin.

Zv.kryeministri grek pritet që nesër të vazhdojë vizitën në Shkup dhe Tiranë.