Ashtu si një vit më parë, Gentjan Muça do të veshë fanellën e Kukësit për sa kohë që skuadra verilindore do të jetë e impenjuar në ndeshjet e Ligës së Europës.
Konfirmimi ka ardhur publikisht edhe nga skuadra e Tiranës, e cila ka dashur të qetësojë tifozët të cilët mendonin se futbollisti mund t'u jepte lamtumirën bardhebluve.
"Gentjan Muça do të luajë me Kukësin në Europa Ligë. Klubi ka miratuar sot kërkësen e bërë nga FK Kukësi për të marrë mbrojtësin bardheblu me formulë huazimi për aventurën europiane. Në përfundim të kësaj aventure, Muça do të rikthehet sërish te Tirana për të vijuar përgatitjet për sezonin e ri.
Në mungesë të pjesëmarrjes në Kupat e Europës, klubi po punon për të afruar në skuadër lojtarët e duhur për të rikthyer Tiranën në nivele të larta. Shumë shpejt do të zyrtarizohen përforcimet e para, axhenda për përgatitjet parasezonale dhe ndryshime të tjera që po bëhen për të sjellë suksesin e munguar", shkruhej në njoftimin e klubit bardheblu.
