Stoli i Kombëtares italiane të futbollit ndodhet ende pa një zëvendësues pas largimit të pritshëm të Antonio Kontes në mbyllje të "Euro 2016".
Ndërsa lista e kandidatëve të mundshëm është ngushtuar, detaja të tjera zbardhen për sa i përket pagës që tekniku i ardhshëm i 'axurrëve' do të marrë.
Presidenti i Federatës Italiane të Futbollit, Karlo Tavekio, thotë se Italia do të ketë emrin e ri para fillimit europianit që do të zhvillohet në Francë.
Edhe pse nuk u ndal në emra konkretë, Tavekio u shpreh se trajneri i ardhshëm do të marrë gjysmën e pagës që merr trajneri aktual.
Sipas tij, Konte i kushton Italisë rreth 10 milionë dollarë në vit dhe pasuesi do të marrë gjysmën e pagës.
Numri një i futbollit italian ka zbardhur edhe disa nga karakteristikat që emri i ri duhet të këtë: "Kohëzgjatja e kontratës së Antonio Kontes ishte e njohur edhe nga fëmijët. Dy vite ishin kushtet e firmosjes së tij.
Zgjedhja e tij për të shkuar të Çelsi nuk na vë në vështirësi dhe nuk kushtëzon Europianin. Jam i bindur se do bëjmë më të mirën. Kush do të ulet në të ardhmen në pankinën italiane? Duhet të ketë karakteristikat e Kontes, por jo rrogën e tij.
Mund të shkojmë deri te gjysma e asaj që është shpenzuar deri më tani, pra, 10 milionë euro në sezon",-ka thënë Tavekio, sipas të përditshmes italiane "Corriere dello Sport".
Deklarata e tij vjen një ditë pasi presidenti i Lacios, Klaudio Lotito mbështeti hapur kandidaturën e Xhani De Biazit për stolin e Italisë.
Pak ditë më parë, kandidatura e trajnerit të Kombëtares shqiptare të futbollit është mbështetur edhe nga ish-trajneri italian, Marçelo Lipi.
Aktualisht, kandidatët më potencialë për stolin e Italisë janë Klaudio Ranieri, Roberto Donadoni dhe Simone Ventura.
