105 vjetori i lindjes së Selahudin Totos, Akademia e Shkencave studim për elitat gjatë regjimit komunist.-

Me rastin e 105 vjetorit të lindjes së Drejtorit të parë të Akademisë së Shkencave, Selahudin Toto, sot u organizua një konferencë për rolin e shkencës, elitave intelektuale dhe kërkimit shkencor në vitet e para të regjimit komunist në Shqipëri.

Thelbi i këtyre kërkimeve ishte të kuptohej sesa e “lirë” ka qenë elita shqiptare në vitet 1945-1954.

Kërkimet u zhvilluan në nder të titullarit të parë të këtij institucioni, Selahudin Totos, deputet i dënuar nga regjimi komunist sepse doli kundra ideologjisë marksiste.

Personalitete të tjerë  shumë të rëndësishëm për historinë, shkencën dhe letërsinë e vendit e tonë që do studiohen në kuadër të kësaj qasjeje shkencore janë , Eqerem Çabej, Arshi Pipa dhe Aleks Buda.

Në fjalën e mbajtur gjatë konferencës Prof. As. Dr. Sonila Boçi thekson faktin se ideologët e Enver Hoxhës detyronin elitat që të mos shkruanin të vërteta por të shkruanin atë çfarë regjimi i detyronte.

“Pjesa më e madhe e e elitës u ekzekutua, por edhe ata që vazhduan aktivitetin e tyre kishin një lloj përndjekjeje ndonëse jo në mënyrë të drejtëpërdrejtë” tha Bocci gjatë fjalës së saj.

Pjesë e këtij projekti janë 5 studiues dhe 5 studentë, ndër studuesit përfshihen Prof,As.Dr. Sonila Boçi e cila është drejtuesja e grupit të kërkuesve dhe Prof. Dr. Nevila Nika, historiane dhe studiuese njëkohësisht stërmbesa e Totos.

Në fund të kësaj konference famijarëve Selahudin Totos ju dorëzua diploma e tij nga përfaqësues të ambasadës italiane.