7 Shtator 2024

Berati po përjeton ëndrrën turistke, por ky vit i ka tejkaluar parashikimet.

70 mijë turistë kanë prerë biletën për të parë Muzeun Ikonografik të Onufrit nga Janari deri në Gusht 2024.

“Në vitin 2023 jam njohur me një reklamë shqiptare, pastaj mora informacion dhe kam bërë rezervimin në Dhjetor 2023 ditën e Krishtlindjes. Përveç Beratit do të shkojmë edhe në plazhet e jugut”.

“Kemi dy ditë në Berat, na pëlqeu sepse është shumë i hapur për turizmin, shumë interesant dhe jemi strehuar në pjesën muzeale në Mangalem”.

Muzeu Ikonografik Onufri është vizituar 52% më shumë nga turistët këtë vit, krahasuar me të njëjtën periudhë të vitit të kaluar.

Të paktën deri në Dhjetor ky muze i ka biletat të shitura tek grupet e mëdha turistike.

Një grup turistësh nga Portugalia kanë ardhur për herë të parë në këtë muze. Historia e tij dhe ikonat e shumta të ekspozuara në muret e brendshme duket se janë tepër të adhurueshme për turistët.

“Jam nga pjesa veriore e Portugalisë, Romave quhet, më pëlqeu  udhëtimi në Ballkan si për herë të parë, ndërsa Shqipëria është një vend i këndshëm, njerëzit janë të qeshur dhe ushqimi i mirë. Qytetet që kam parë deri tani janë Kruja, Shkodra, Berati dhe Durrësi. Muzeu paska shumë vizitorë, qenka bukur këtu”.

Rradhët e gjata për të hyrë në muze kanë sjellë turistë të shumtë, të cilët pëlqejnë vendet me trashëgimi të vjetër kulturore dhe historike.

“Më pëlqeu shumë muzeu, është i  bukur dhe ikonat shumë impresionuese, po kështu është edhe Berati, qenka një nga qytetet e pakta të paprekura dhe trashëgimia historike e vjetër është ruajtur mirë, stili origjinal i ruajtur me fanatizëm”.

Muzeu i Onufrit është përfshirë si paketë e përgjithshme turistike e Beratit dhe është i vetmi në rajon dedikuar tërësisht artit ikonografik.

Niveli i lartë artistik i ikonave të shekullit të XVI është i ekspozuar me 200 punime vetëm në Onufër pa llogaritur edhe ikonat që kanë kishat e tjera mesjetare të Beratit.