DW: Ultimatumi prej dy javësh për shpërndarje Parlamenti. Manifestimi në Tiranë dhe çfarë kërkojnë qytetarët,
DW: Ultimatumi prej dy javësh për shpërndarje Parlamenti. Manifestimi në Tiranë dhe çfarë kërkojnë qytetarët,
3 mars 2020
Mbyllet pa incidente manifestimi në Tiranë për mbrojtjen e Kushtetutës. Presidenti Meta dhe opozita hodhën akuza të rënda ndaj qeverisë në Shqipëri.
Presidenti i Shqipërisë, Ilir Meta kërcënon me shpërndarje të Parlamentit. Ai i dha maxhorancës socialiste, të hënën (2/03/2020) një ultimatum dy javor, deri në 15 mars, për të rishikuar ndryshimet kushtetuese në ligjin për Gjykatën Kushtetuese (GJK), të miratuara kohët e fundit.
Në manifestimin qytetar të thirrur prej tij dhe të zhvilluar të hënën, ai tha se pret deri në 15 mars, ditën e miratimit të Reformës Zgjedhore, që maxhoranca “të reflektojë”, lidhur me ndryshimet kushtetuese në ligjin për GJK.
Në rast të kundërt Meta deklaroi në manifestim se “do të shpërndajë me dekret Parlamentin”.
Shkarkimi i Metës
Por Parlamenti vazhdon procedurat për shkarkimn e Presidentit Meta, për shkelje të Kushtetutës me anullimin e datës së zgjedhjeve lokale 2019. Por vendimin përfundimtar për këtë çështje e merr GJK, që në Shqipëri nuk funksionon prej korrikut 2018, për shkak të nxjerrjes jashtë sistemit të shumicës së gjyqtarëve të saj gjatë procesit të vetingut.
Para manifestuesve të shumtë, Meta firmosi, në mënyrë simbolike, dekretin e anulimit të ndryshimit të procedurës së betimit të gjyqtarëve të GJK, të miratuar nga Parlamenti, të cilat i heqin atij ekskluzivitetin e betimit të tyre në Presidencë dhe ligjërojnë alternativën e dërgimit në Presidencë të betimit me shkrim, për ata që brenda afatit kushtetues Meta nuk i thërret.
“Nëse grushti i shtetit, organizata mafioze ndërkombëtare, nuk e merr seriozisht këtë dekret, unë e jap fjalën se pas datës 15 mars, kur të përfundojë Reforma Zgjedhore, populli kuqezi që votoi sot për vdekjen e grushtit të shtetit dhe unë Ilir Meta betohem se atë dekret nuk do ta firmos këtu, por në mes të Parlamentit, atje, në mes të krimit”, tha Meta në fjalën e tij duke implikuar edhe ndërkombëtarët.
Meta akuzon qeverinë dhe ndërkombëtarët
Presidenti Meta e akuzon qeverinë Rama se po “dhunon Kushtetutën duke kërkuar të kontrollojë anëtarët e GJK” dhe të emërojë 6 anëtarë nga trupa prej 9 vetash e gjyqtarëve të kësaj Gjykate.
Meta dhe opozita jashtë parlamentare deklarojnë se reforma në drejtësi, që synon ҫrrënjosjen e korrupsionit tek gjykatësit dhe prokurorët, ka dështuar.
“Kjo pranverë kuq e zi nuk do të ndalojë deri në rivendosjen e sovranitetit të vendit”, tha ai në manifestim duke theksuar se ai është shkelur jo vetëm nga maxhoranca socialiste por edhe nga ndërkombëtarët, që „kanë devijuar reformën në drejtësi”.
Thirrjes së Metës për të manifestuar në “mbrojtje të Kushtetutës” iu përgjigj edhe opozita jashtë parlamentare e kryesuar nga Partia Demokratike, që kërkon zgjedhje të parakohshme parlamentare qe vendi të dalë nga kriza e gjatë politike dhe institucionale.
Gazeta Panorama