Është Erion Veliaj që ka protestuar kundër socialistëve, që e ka nxjerrë PS-në në opozitë në vitin 2005.
9 Dhjetor 2024
Erion Veliaj, në kurrizin e socialistëve.
Një barrë e madhe po u vihet socialistëve që nuk fillon dhe nuk mbaron te zgjedhjet. Është një peshë e rëndë për ta, është dikush që është si një çiban brenda tyre, që nuk ka lidhje me PS-në.
Është ai që ka protestuar kundër socialistëve, që e ka nxjerrë PS-në në opozitë në vitin 2005. Ndërkohë që më pas pretendonte të ishte trashëgimtari dhe të merrte drejtimin e asaj partie.
Erion Veliaj sot është bërë një barrë, është një kosto e madhe për socialistët, nuk janë zgjedhjet e ardhshme. Ato rrezikojnë t’i humbin vetëm nga Erion Veliaj.
Në sondazhet që Rama i ka mbi tavolinë që shumë politikanë socialistë i dinë, përfshirë këtu dhe kryebashkiakun e Tiranës, Erion Veliaj është politikani më i urryer në Shqipëri ndoshta dhe më shumë se Ilir Meta, më shumë sesa Sali Berisha.
Dy të fundit kanë pasur partitë e tyre, kanë dekada në politikë, kanë shumë pasoja padiskutim, janë të gjykueshëm si çdo qytetar tjetër por Erion Veliaj nuk ka patur as parti, as kontribut. Kontriubuti i tij i vetëm është rrëzimi i socialistëve dhe sot si mallkim, pas gati 20 vitesh, qëndron si hanxhar mbi kokat e socialistëve.
Në 2005 protestonte kundër Fatos Nanos dhe e rrëzoi. Bashkohej me Falmur Nokën në protesta shkonte dhe sulmonte socialistët për interesat e tij.
Sot e ka kapur PS-në për fyti dhe nuk largohet. Nuk është i rëndësishëm apo jo largimi nga partia apo drejtimi i Tiranës se Edi Rama tashmë e ka çuar në një cep por Erion Veliaj duhet të marrë përgjigjen para drejtësisë dhe Erion Veliaj duhet të largohet nga Bashkia e Tiranës.
Çdo minutë që ai rri sjell vetëm dëme të pafund për kryeqytetin dhe socialistët, dëme që priten të jenë elektorale.
Që Erion Veliaj ka rënë politikisht, kjo nuk diskutohet, që drejtësia do të shkojë deri në fund edhe kjo nuk ka asnjë diskutim.
Problemi është se cilat do të jenë kostot elektorale për PS? Cilat do të jenë pasojat për socialistët? Pasi koka e Erion Veliajt para drejtësisë mund të jetë një dëm i pallogaritshënm elektoral dhe me pasoja shumë të larta aq sa kjo mund të çojë dhe në humbjen e zgjedhjeve.
Këtë po thonë të gjithë, edhe analistët pro Veliajt, edhe gazetarët pro tij edhe socialistët kur i pyet.
Në një moment sinqeriteti thonë se kosto që po jepet tani në këtë momente është shumë e madhe, SPAK nuk duhet ta arrestojë tani por pas zgjedhjeve e kështu me radhë.
Në fakt, SPAK dhe Gjykata nuk do ta arrestojnë kur duan socialistët dhe demokratët, por kur të mbyllen hetimet, kur të dalin faktet dhe provat.
Për rastin e Erion Veliajt nuk ka nevojë për shumë fakte dhe prova. Janë inceneratorët aty, është dosja 5D aty, klientelizmi dhe korrupsioni është aty.
Gjithçka është mjaft e qartë. Erion Veliaj tashmë ka rënë por mesa duket po merr pas socialistët dhe pushtetin e tyre, si një mallkim për ta.
Erion Veliaj nuk është thjesht dhe vetëm barrë, por është një peshë e madhe mbi kurrizin e një partie që mund të ketë shumicën e votave të shqiptarëve por që ka një çiban brenda saj që po e helmon dhe po e çon sërish në opozitë si 20 vite më parë./ CNA
Nga OraNews