18 Shkurt 2023

Është gjetur meteori i Shën Valentinit. Kështu shkruajnë mediat italiane, teksa përshkruajnë rënien e copave
të objektit qiellor me masë totale rreth 400-500 gram që ra më 14 shkurt.

Mostrat janë marrë në Basilicata, ku u identifikua si vendi i rënies, një zonë në veri të Materas. Meteori ra vertikalisht në tokë me një shpejtësi prej rreth 300 kilometrash në orë dhe nga përplasja copëtoi një pllakë të ballkonit që shkon përgjatë perimetrit të një shtëpie midis Contrada Rondinelle dhe Contrada Serra Paducci, në qytetin e Materas.

Kjo u njoftua nga Prisma, rrjeti i parë italian që studioi meteorët dhe atmosferën e Institutit Kombëtar të Astrofizikës.

Në të njëjtën ditë të rënies, më 14 shkurt, Prisma raporton në një shënim, “në ballkonin e shtëpisë së prindërve të Gianfranco dhe Pino Lossignore, disa gurë tërhoqën vëmendjen e dy vëllezërve. Edhe sepse prindërit e moshuar kishin dëgjuar një zhurmë të fortë mbrëmjen e mëparshme që vinte nga jashtë”. Më shumë se 70 gramë janë gjetur deri më tani në 12 fragmente kryesore dhe dhjetëra fragmente më të vogla, tha Prisma.

Pasi kanë parë ato fragmente, dy vëllezërit kanë komentuar: “Një gjë tronditëse, por shumë emocionuese”.