Kërcënimet me vdekje

Margret Sturm, optometriste, familja e së cilës ka shitur syze për më shumë se 60-vjet në Sonneberg, ka shprehur shqetësimin e saj për fitoren e AfD-së. “U kam thënë atyre se nuk është mirë që po votojnë për AfD-në. Kushdo që ka votuar AfD-në duhet ta dijë se prapa tyre janë nazistët”, thotë Sturm.

Kërcënimet ishin aq të pamëshirshme sa bashkëshorti i Sturmit ka vendosur kamera brenda dyqanit. Mirëpo Sturm, 60-vjeçare, thotë se nuk do të lërë askënd që ta mbajnë të heshtur.

“Njerëzit këtu kanë frikë të kundërshtojnë AfD-në dhe kjo na shqetëson më shumë se çkadotjetër”, shton ajo.

Ajo thotë se banorët e tjerë që kanë kundërshtuar AfD-në më nuk shprehin kritikat e tyre hapur.

“Ky është fiks ai lloji i poshtërimit që është rezultat i makinerisë së urrejtjes dhe nxitjes që fatkeqësisht përhap. Kjo më shqetëson mua”, thotë Stephan Kramer, shef i agjencisë shtetërore të inteligjencës së brendshme të Thuringias në qytetin Erfurt.

Kramer për vite të tëra ka paralajmëruar se dega e AfD-së në Thuringia është shumë radikale dhe se ishte vendosur në mbikëqyrje zyrtare para më shumë se dy vjetësh si grup “i provuar i ekstremizmit të djathtë”.

Mirëpo Knoth nuk shqetësohet se AfD-ja është nën mbikëqyrje të agjencisë së inteligjencës për shkak të lidhjeve me ekstremistët e djathtë.

“Është zgjedhur në mënyrë demokratike, nuk shoh asgjë të keqe në këtë”, thotë ai.

Knoth pret që AfD-ja të ketë qasje “rend dhe ligj”, të ndal migrimin dhe ta bëjë Gjermaninë më të sigurt.

Përballja me migrimin ose luftimi i krimit janë tema të rënda që i përkasin administratorit lokal, por Robert Sesselmann me fushatën me këto tema doli të jetë i suksesshëm.

Zgjedhjet në Sonneberg që u mbajtën në muajin qershor e vendosën Sesselmannin përball rivalit të qendrës së djathtë, Jürgen Köpper. Sesselmann fitoi me 52.8 për qind, ndërkaq rivali përfundoi me 47.2 për qind.

Sonnebergu ka popullsi prej 56 mijë e 800 banorësh, mirëpo fitorja ishte një sukses simbolik për AfD-në.

I papunësuari, Radoslaw Schneider, 39-vjeçar, gjithashtu pret që gjërat të përmirësohen tani që Sesselmann është në krye të qytetit. Ai thotë se AfD-ja “beson se diçka duhet ndryshuar edhe për gjermanët” dhe se të huajt nuk duhet të trajtohen më mirë.

Ngritja e AfD-së

Alternativa për Gjermaninë për herë të parë hyri në Bundestag në vitin 2017 pas fushatës kundër migrantëve që e realizoi si reagim për ardhjen masive të refugjatëve në Evropë.

Partia, dhjetë vjet e vjetër, në sondazhe ka arritur në nivele rekorde mes 18 dhe 20 për qind të përkrahjes në nivelin kombëtar.

Koalicioni qeverisës i Olaf Scholzit të qendrës së majtë me ambientalistët e gjelbër dhe pro biznesit “Demokratët e Lirë”, përballet me kritika për migrimin e lartë, planin për të zëvendësuar sistemin e ngrohjes për miliona shtëpi dhe për inflacionin që mbetet i lartë.

Lideri i AfD-së në Thuringia, Björn Höcke, ka përqafuar qëndrimet revizioniste të Gjermanisë naziste. Në vitin 2018, memorialin e Holokaustit në Berlin e ka cilësuar si “monument të turpit” dhe i kishte bërë thirrje Gjermanisë që të bënte kthim prej 180 shkallësh kur bëhej fjalë për mënyrën sesi kujton të kaluarën e saj.

Bastion i nazizmit

Në fillim të viteve ’30, Thuringia ishte një prej bastioneve të para të Partisë Nacionale Socialiste të Adolf Hitlerit. Në ditët e sotme, AfD-ja u bën thirrje sidomos gjermanëve në landet ish-komuniste dhe më pak të begata lindore, si Thuringia.

Pandemia e koronavirusit, lufta ruse në Ukrainë dhe fluksi i mijëra refugjatëve nga Ukraina drejt Gjermanisë, kanë ndihmuar në suksesin e AfD-së, thotë deputetja Katharina König-Preuss nga partia “E Majtë” në Thuringia.

Kjo parti ka fajësuar problemin me migrantët dhe qeverinë kombëtare.

“Unë do të thosha se një pjesë e madhe e këtyre tregimeve raciste, të cilat nuk përputhen fare me realitetin, tani janë kapur me një pjesë më të madhe të popullsisë së Gjermanisë Lindore”, thotë König-Preuss, e cila është një nga kritiket më me zë të AfD-së dhe disa herë ka marrë këcënime me vdekje.

Kancelari Scholz është përpjekur të minimizonte rritjen e fundit të populistëve të ekstremit të djathtë.

“Gjermania ka qenë demokraci e fortë për një kohë të gjatë tani, që nga Lufta e Dytë Botërore”, ka thënë Scholz gazetarëve në Berlin javën e kaluar pasi u pyet se çfarë po bën për të parandaluar rilindjen e fashizmit 77 vjet nga rënia e Hitlerit.

Ishte sundimi nazist i Gjermanisë, i cili çoi në vrasjen e 6 milionë hebrenjve evropianë dhe të tjerëve, dhe më shumë se 60 milionë të vdekur në Luftën e Dytë Botërore, që e lanë Kramerin disa net rresht.

“Kur shikoj këtë zhvillim në Gjermani, vendi ku vrasja masive industriale u çua në përsosmëri, atëherë ky është i ndryshëm nga të gjitha vendet e tjera”, thotë ai.

Në vjeshtën e vitit 2024, do të ketë zgjedhje shtetërore në Thurnigia. AfD-ja kryeson në sondazhe me më shumë se 30 për qind të përkrahjes.

Nëse AfD-ja, e cila aktualisht është ende e shmangur nga të gjitha partitë e tjera kryesore në Gjermani, do të bëhet pjesë e qeverisë së shtetit, atëherë Kramer, i cili është hebre, do të largohet nga vendi me familjen e tij.

“Ne kemi parë më parë në histori se ku mund të çojë kjo”, thotë ai. “Dhe duhet të rrëfej sinqerisht, nuk kam dëshirë të pres që të ndodhë përsëri”.

Gazeta Dita