2 Prill 2025

Zv/kryeministrja Belinda Balluku po tregon çdo ditë se është një faktor i rëndësishëm në Partinë Socialiste dhe po forcon gjithnjë e më shumë pozitat e saj brenda strukturave të partisë, teksa këtë herë ajo ka shfrytëzuar tensionet për një zgjedhje të mundshme të parakohshme në Bashkinë e Tiranës, pas arrestimit të kryebashkiakut Erion Veliaj, të cilin ajo e ka pasur rival, madje armik. Konkretisht sot që flasim lufta për postin e kryetarit të Bashkisë së Tiranës është më e nxehtë se kurrë, dhe në qendër të saj qëndrojnë dy figura të afërta të ministrit të Infrastrukturës dhe Energjisë, Belinda Balluku: Evin Hoxha, ministri i Brendshëm, dhe Blendi Gonxhe, ministri i Ekonomisë dhe Inovacionit. Këta dy ministrat janë të vendosur në listat e hapura të kandidatëve për deputetë në zgjedhjet e 11 majti, por kjo nuk është rastësi.

Ata janë, pa dyshim, të “piketuara” nga Balluku si kandidatë të mundshëm për të pasuar Erion Veliajn, pasuesin e tij në Bashkinë e Tiranës. Të dy ata janë lënë qëllimisht në listat e hapura për të minimizuar mundësinë e konkurrencës së fortë nga figura të tjera të PS-së, duke i mundësuar kështu një avantazh të rëndësishëm për kandidaturën për kryetar bashkie, duke qenë se mund të mos arrijnë të marrin mandat. Kjo manovër është një pjesë e një plani të gjerë të Ballukut për të konsoliduar pozitat e saj brenda PS-së dhe për të pasur ndikim të drejtpërdrejtë në udhëheqjen e kryeqytetit. Pra në një moment kur Veliaj është në burg dhe Bashkia mund të shkojë në zgjedhje të parakohshme, kjo mund të jetë shansi i fundit për të shfrytëzuar mundësinë e një marrëveshjeje të brendshme politike që do të ndikojë edhe në të ardhmen e PS-së, ku padyshim që fijet i lëviz Balluku në prapaskenë.

Lëvizje në Bashkinë e Tiranës

Megjithatë sinjalet se Bashkia e Tiranës i intereson shumë zv/kryeministres Balluku janë dhënë dje, ku një njeri i ministres ka marrë një postë të rëndësishme në këtë bashki. Kryetarja e komanduar në Bashkinë e Tiranës, Anuela Ristani ka emëruar dy menaxherët e rinj të UKT-së në Tiranë. Burime mediatike bëjnë me dije se emra të rinj janë emëruar në krye të drejtorive dhe “hallkave” më të rëndësishme në këtë Bashki. Mësohet se drejtor i Përgjithshëm i UKT është emëruar Skerdi Drenova, ndërsa zv/drejtor Kujtim Nanaj. Një tjetër emërim që është bërë në këtë institucion është dhe ai i Eldi Hoxhës. Kryebashkiakja në detyrë, e cila u ul në karrigen e të parës së qytetit pas arrestimit të Erion Veliajt, i ka besuar Hoxhës drejtimin e Drejtorisë së Koordinimit dhe Bashkërendimit.

Çfarë ka ndodhur në Bashkinë Tiranë?

Ndërkohë kujtojmë se qysh prej momentit kur iu deleguan detyrat e kryetares së Bashkisë së Tiranës, Anuela Ristani dukej se kishte piketuar shkarkimin nga detyra të drejtorit të Ujësjellës Kanalizimeve Tiranë (UKT), Kostandin Budurushin, të cilin Erion Veliaj e emëroi vetëm pak kohë para se të arrestohej nga SPAK. Kjo ishte një “hakmarrje” nga ana e saj, pasi Budurushi kishte shkarkuar nga puna bashkëshortin e saj, Bledi Çikopana, një ish-punonjës i UKT-së. Në krye të UKT-së, Anuela Ristani kishte planifikuar të emëronte Kujtim Nanaj, një të besuar të bashkëshortit të saj dhe të ish-drejtorit të UKT-së Elton Kacidhes.

Për këtë shkak, ndaj Kostandin Budurushit po ushtrohej presion për ta larguasr nga detyra. Mediat raportojnë se së fundmi, Anuela Ristani ka firmosur shkarkimin e Kostandin Budurushit, por për drejtorin e ri të UKT-së, ka ndërhyrë në momentin e fundit Edi Rama, që ashtu siç e ka deklaruar edhe vetë, është kryebashkiaku “de facto” i Bashkisë së Tiranës. Sipas mediave, Rama ka urdhëruar për të emëruar në krye të UKT-së, Skerdi Drenovën, dhe Anuela Ristani, si gjithmonë, ka zbatuar urdhrin e tij. Ndërkohë, Kujtim Nanaj është emëruar në postin e nëndrejtorit të UKT-së. Skerdi Drenova ka mbajtur disa poste të rëndësishme në institucionet në varësi të Mininistrisë dhe Infrastrukturës dhe Energjitikës, së drejtuar nga Belinda Balluku.

Që prej Janarit të vitit 2019, Skerdi Drenova ka mbajtur postin e drejtorit të Operatorit të Sistemit të Transmetimit (OST), deri në Janar të këtij viti, kur Balluku vendosi ta shkarkonte nga kreu i OST-së dhe e emëroi në postin e drejtorit tek “Albgaz” sh.a. e cila është një shoqëri aksionere me 100% të aksioneve të zotëruara nga shteti shqiptar. Me emërimin e Skerdi Drenovës në krye të UKT-së, mund të shihet edhe si një shtrirje e “tentakulave” të Belinda Ballukut edhe në Bashkinë e Tiranës, tashmë pas arrestimit të rivalit të saj brenda partisë, Erion Veliajt.

Nga: Gazeta Sot