28 Tetor 2024

Ervin Karamuço, ka paralajmëruar se pas Ilir Metës, do të ketë shumë emra të tjerë që do të arrestohen nga Prokuroria e Posaçme (SPAK). Teksa ishte i ftuar një një studio televizive zbuloi se një nga dosjet e SPAK përfshin edhe emra të kolegëve të prokurorëve të këtij institucioni. Karamuço sqaroi se, përveç prokurorëve, në dosjen e cila njihet si “Toyota Yaris”, janë përmendur edhe politikanë të lartë të së majtës, duke ngritur pyetjen nëse hetimi për këtë çështje duhet të kryhet nga një prokuror i huaj. “Unë shikoj se mos po mbrohet ndonjë. Kush po e bën këtë? Mos po e bën SPAK-u vetë? Pasi duan të ekspozohet këtu dhe mos të ekspozohet këtu.

Por sidomos te rasti i korrikut, i Toyota Yaris, ka kolegë të prokurorëve të SPAK-ut, që SPAK-u duhet t’i hetojë. Mos ka ardhur koha që për atë dosje duhet ndonjë prokuror i huaj, se këta shqiptarët nuk e di sa integritet do kenë për ta hetuar atë dosje. Janë duke u bërë verifikime. Në atë dosje ka edhe politikanë të së majtës brenda; edhe ata po verifikohen, pozita e tyre, po kryqëzohen të dhënat nëse kanë qenë në ato vende. Ne nuk duhet të marrim vesh hollësitë, por një gjeneralitet të përgjithshëm të kësaj ngjarjeje, se kush është i përfshirë, ne duhet ta kemi”, deklaroi  ai. Ndërkohë Karamuço ka deklaruar se me arrestimin e Metës, SPAK theu mitin e pandëshkueshmërisë. “Ka dhe probleme të brendshme.

Nuk janë të gjithë prokurorët njësoj. Zoti Dumani dhe ndërkombëtarët duan të ndryshojë ligji që të ketë zgjatje të mandatit ose ripërtëritje. Politika nuk e do këtë gjë. Por ai për 9 vite do jetë aty. Dumani hyri në historinë e Shqipërisë, u fut si drejtues i kësaj prokurori. Ndikuam ne,  apo media, ndoshta. Mbase një drejtues i ardhshëm do trajtojë çështje të tjera. Por tani SPAK ka krijuar besim. Ka shumë elemente pozitive. Miti u thye. Nuk ka më mit të pandëshkueshmërisë. Do shihni emra të tjerë që nuk ja u merrte mendja kurrë që do ishin aty. Ka shumë të tjerë aty. Koha është e gjatë. Misioni do të vijojë dhe sa kohë ka një kallëzim. Ishim mësuar të bënim kallëzime dhe humbnin. Zyrtarët duhet t’i shqetësojë shumë edhe një kallëzim nga një qytetar i zakonshëm”, nënvizoi Karamuço.

Gazeta Sot