9 Maji 2023

Kur çifti afrikano-jugor Max dhe Joy Ulfane filluan të kërkonin shtëpinë e tyre të ëndrrave italiane rreth 28 vjet më parë, ata kurrë nuk e imagjinuan se do të përfundonin duke blerë një kështjellë të rrënuar në Toskanë.

Por sipërmarrësit me bazë në Mbretërinë e Bashkuar ranë menjëherë në dashuri me Castello di Fighine, një kështjellë mesjetare e lënë pas dore kur e gjetën atë në 1995.

Që atëherë ata e kanë transformuar kështjellën, e cila ngrihet 650 metra mbi nivelin e detit në komunën e San Casciano dei Bagni, pranë kufirit Umbrian, në një shtëpi të dytë luksoze.

“Kemi bërë shumë përpjekje dhe dashuri këtu, duke u përballur dhe tejkaluar sfidat. Dhe shumë e shumë para për ta rikthyer këtë vend në jetë”, tha Joy Ulfane për CNN. 

“Dhe të mendosh se nuk kemi dashur kurrë një kështjellë.”

Çifti kishte parë dhjetëra prona në të gjithë Italinë përpara se t’i tregonin kështjellën në majë të kodrës, e rrethuar nga ullishte dhe pyje.

Megjithëse ishte i rrënuar dhe plot rrënoja, çifti pa një potencial të madh në Castello di Fighine dhe mendoi se ishte vendi i duhur për ta. Ata e blenë atë dhe së shpejti filluan një proces rinovimi katërvjeçar. Në fakt, pak më vonë ata vendosën të blinin disa nga shtëpitë e shkatërruara në zonë dhe filluan t’i rinovonin pasi kishin përfunduar pjesën më të madhe të punës në Castello di Fighine. Ky proces zgjati tetë deri në dhjetë vjet të tjera.

“Kështjella është cilësuar si pronë historike. Kështu që pa lejet e nevojshme nuk mund të shqetësonim asnjë gur”, nënvizoi Joy Ulfane. Sipas ligjit italian, çdo ndryshim strukturor që mund të ndryshojë arkitekturën dhe qëllimin origjinal të një prone historike duhet të mbikëqyret dhe të jepet drita jeshile nga zyra kompetente, duke vendosur shumë kufizime në llojin e punës që mund të bëhet rinovim.