Lloji i ri i koronavirusit në Britani po përhapet shumë shpejt. OBSH nis studimet.

20 DHJETOR 2020.

Organizata Botërore e Shëndetësisë (OBSH) ka thënë se është në “kontakt të ngushtë” me zyrtarë të Mbretërisë së Bashkuar, pas shfaqjes së një varianti të ri të koronavirusit.

Varianti i ri po përhapet më shpejt, por nuk besohet të jetë më vdekjeprurës.

Pjesë të mëdha të Anglisë jug-lindore, përfshirë Londrën, tani janë nën një nivel të ri, më të rreptë të kufizimeve në një përpjekje për të frenuar virusin që përhapet me shpejtësi.

Nuk ka asnjë provë që sugjeron se varianti i ri reagon ndryshe ndaj vaksinave.

Të Dielën, Holanda futi një ndalim të fluturimeve të pasagjerëve nga Mbretëria e Bashkuar, për shkak të variantit të ri. Ndalimi do të qëndrojë në fuqi deri në 1 janar, tha qeveria Holandeze.

Qeveria Holandeze gjithashtu tha se do të punojë me vendet e tjera anëtare të Bashkimit Evropian në ditët e ardhshme për të “shqyrtuar hapësirën për kufizimin e mëtejshëm të rrezikut të llojit të ri të virusit që është përhapur në Mbretërinë e Bashkuara”.

Shkencëtarët britanikë u përballën të shtunën me një sfidë serioze për të konfirmuar nëse një mutacion i koronavirusit ishte shfaqur këtë muaj në Angli, i cili mund të jetë rezistent ndaj vaksinave që po prodhohen aktualisht.

Varianti i ri u identifikua më 13 dhjetor në komunën e Kentit në Anglinë e jugut dhe analizat fillestare të shkencëtarëve qeveritarë çojnë përfundimin se ky virus “po përhapet më me shpejtësi se variantet ekzistuese”.

Kryeministri britanik, Boris Johnson zhvilloi një mbledhje të kabinetit të premten ndërkohë që po shtohet alarmi për kërcënimin nga ky mutacion, i cili është pagëzuar me inicialet VUI -202012/01. Zoti Johnson tha në një konferencë për shtyp të shtunën se nuk ka ende prova që vaksinat ekzistuese nuk japin efekt përballë këtij varianti, por shtoi “Ka shumë të panjohura ende”.

Ai vuri në dukje se variant i ri është deri në 70% më ngjitës se variantet e mëparshme.

Gazeta Shqip.