5 Prill 2025

Një mi që zbulon minat tokësore në Kamboxhia ka vendosur një rekord të ri botëror për t’u bërë brejtësi i parë, që zbuloi më shumë se 100 mina dhe mbetje të tjera vdekjeprurëse të luftës.

Ronin, një mi gjigant afrikan, ka zbuluar 109 mina tokësore dhe 15 objekte municionesh të pashpërthyera që nga viti 2021, tha në një deklaratë shoqata bamirëse Apopo, e cila trajnon kafshët.

Kamboxhia mbetet e mbushur me miliona municione të pashpërthyera, pas rreth 20 viteve të luftës civile që përfundoi më 1998.

Libri Guinness i Rekordeve Botërore tha se “puna vendimtare” e Ronin po bën një ndryshim të vërtetë për njerëzit, që u është dashur të jetojnë me “frikën se një hap i gabuar gjatë jetës së tyre të përditshme mund të jetë i fundit”.

Apopo, e cila është e vendosur në Tanzani, aktualisht ka 104 rekrutë brejtësish, ose HeroRATS, siç pëlqen t’i quajë organizata jofitimprurëse.

Minjtë janë trajnuar për të nuhatur kimikatet që gjenden në minat tokësore dhe armët e tjera të braktisura në fushat e betejës. Për shkak të madhësisë së tyre të vogël, minjtë nuk janë aq të rëndë sa të shpërthejnë minat.

Minjtë mund të kontrollojnë një zonë sa një fushë tenisi në rreth 30 minuta, thotë bamirësia, ndërsa një njeriu me një detektor metali mund të marrë katër ditë për të pastruar të njëjtën tokë.

Ata gjithashtu mund të zbulojnë tuberkulozin, një sëmundje infektive që zakonisht prek mushkëritë, shumë më shpejt se sa do të gjendej në një laborator duke përdorur mikroskopinë konvencionale, thotë Apopo.

Duhet rreth një vit për të trajnuar çdo mi, për të zbuluar minat tokësore të pashpërthyera

Puna mbresëlënëse e Ronin në provincën veriore Preah Vihear të Kamboxhias ka tejkaluar rekordin e mëparshëm që mbante Magawa, një mi që nuhati 71 mina dhe iu dha një medalje ari për heroizmin e tij më 2020.

Që nga fillimi i punës së Apopo 25 vjet më parë, organizata ka pastruar 169,713 mina tokësore dhe eksplozivë të tjerë në mbarë botën – më shumë se 52,000 kanë qenë në Kamboxhia. Organizata bamirëse punon edhe në vende të tjera të prekura nga lufta, duke përfshirë Ukrainën, Sudanin e Jugut dhe Azerbajxhanin.

Sipas Landmine Monitor, ka ende rreth katër deri në gjashtë milionë mina tokësore dhe municione të tjera të shpërthyera të varrosura në Kamboxhia