Padi kundër Bindjes Demokratike: U shkel ligji, KQZ ta çrregjistrojë. –

Gazeta; mapo.al

Partia Bashkimi Demokrat Shqiptar (PBDSH) ka depozituar një ankimim në Kolegjin Zgjedhor kundër regjistrimit të Bindjes Demokratike në zgjedhjet vendore të 30 qershorit. PBDSH shprehet se vendimi i regjistrimit të BD është i paligjshëm dhe politik.

“Duke futur në garë, në kundërshtim me ligjin për partitë dhe Kodin Zgjedhor, organizata politike të paregjistruara në Gjykatë, KQZ cënon kushtet e barabarta në zgjedhje dhe ligjshmërinë e zgjedhjeve. Kodi Zgjedhor thotë qartë se “për të marrë pjesë në zgjedhje një parti duhet të paraqesë vërtetimin e regjistrimit në gjykatë”, gjë që Bindja Demokratike nuk e ka, sepse vërtetimi i paraqitur nuk është i formës së prerë”.

PBDSH thotë se deri në 23 prill 2019, kur ishte afati i fundit për të dorëzuar kërkesat në KQZ, Bindja Demokratike nuk ekzistonte si parti, prandaj pranimi i saj në zgjedhje nga KQZ është i paligjshëm. Në të kaluarën, KQZ dhe Kolegji Zgjedhor kanë ndjekur një praktikë të ndryshme nga kjo që KQZ ka ndjekur për Bindjen me kryetar Astrit Patozi.

“Në 2013 dhe 2015, KQZ nuk ka pranuar të regjistrojë 2 parti në zgjedhje në kushte të njëjta me Bindjen Demokratike, duke argumentuar se sepse vendimi i gjykatës nuk kishte marrë formë të prerë përpara skadimit të afatit për dorëzimin e kërkesës në KQZ. Kolegji Zgjedhor e ka konfirmuar këtë qëndrim të KQZ në 26 prill 2013, për Partinë Civile, duke argumentuar se “pa marrë vendim të formës së prerë regjistrimi në gjykatë, kryetari i partisë së re apo të autorizuarit e tij, nuk ka tagër të paraqesin në KQZ kërksësë për regjistrim”.  E njëjta gjë duhet të vlejë edhe për zotin Astrit Patozi si kryetar i Bindjes Demokratike apo të autorizuarit prej tij, të cilët kanë dorëzuar kërkesë në KQZ për pjesëmarrje në zgjedhje përpara se vendimi i gjykatës për regjistrimin si parti të marrë formë të prerë”.

Duke e konsideruar vendimin e KQZ të paligjshëm, PBDSH kërkon shfuqizimin e vendimit dhe çregjistrimin e Bindjes Demokratike.