Për të arritur një marrëveshje, janë mandatuar dy deputetët, kryetari i Këshillit Kombëtar, z. Edi Paloka dhe ish- Sekretari i Përgjithshëm, z. Gazmend Bardhi.

Derisa të arrihet një marrëveshje do të ishte normale, demokratike dhe qytetare, sidomos nga deputetët, që të shmanget gjuha fyese, përçarëse e denigruese, etiketimet e ndryshme, të cilat na konsumojnë në luftën tonë të brendshme dhe i garantojnë pushtetin Ramës dhe sektit të tij.

Duhet të presim përfundimin e bisedimeve, të cilat uroj të jenë të sinqerta e pozitive për PD dhe opozitën, pasi mundësitë për të dalë me një kandidat ekzistojnë. Sikundër ekzistojnë mundësitë që të kemi marrëveshje më të gjera me çdo faktor opozitar për listën e këshilltarëve bashkiakë.

Finalizimi me sukses i këtyre bisedimeve është hapi i parë për fitoren e zgjedhjeve vendore. Kush nuk e kupton këtë, ose me vetëdije refuzon ta kuptojë, vetëm Partisë Demokratike nuk i shërben.

Gjatë gjithë kësaj kohe, shumë kanë folur me fjali të gjata e fjali të shkurtra, me fjali të plota e fjali të paplota për bashkimin.

Gjithmonë kemi insistuar për një bashkim jo me përjashtime, por bashkim, që nuk përjashton ASNJË demokrat dhe fton të gjithë kontributorët që nga 1990 e deri më sot.

Kundërshtari ynë i vetëm është një dhe vetëm një: abuzuesi i financave dhe pasurisë publike, dëbuesi i qindra- mijëra shqiptarëve, varfëruesi deri në ekstrem i Shqipërisë, grabitësi dhe blerësi me para, shantazhe e patronazhistë, me punësime sezonale e premtime legalizimesh i zgjedhjeve të 25 prillit 2021, sekti Rama.

Këtë sekt e rrëzon vetëm një Parti Demokratike, e bashkuar, e hapur dhe e fortë; e cila duke respektuar votën e lirë, diversitetin e ideve, lirinë e shprehjes, primaret dhe hapjen e partisë; dhe së bashku me të gjitha forcat opozitare e progresiste të shoqërisë shqiptare, do të jetë fituese!