Shkencëtarët paralajmërojnë një pandemi të re, Zëri i Amerikës: Ja përgatitjet që po bëhen

21 MARS 2021

Shkencëtarët thonë se nuk ka dyshime që bota do të goditet nga një pandemi e re dhe se kjo është thjeshtë çështje kohe. Ndaj ata u bëjnë thirrje vendeve në të gjithë botën që të përgatiten për të parandaluar një infeksion të ri vdekjeprurës.

Sipas tyre urbanizimi dhe zgjerimi i habitatit tonë në afërsi të kafshëve vetëm sa shton mundsinë e përhapjes së ndonjë virusi të ri tek njerëzit.

Në këtë laborator të Londrës mostrat e marra nga persona të ndryshëm testohen për rreziqet më të mëdha që i kanosen njerëzimit.

Vullnetarë të shëndetshëm ekspozohen ndaj patogjenëve në mënyrë që shkencëtarët të mësojnë më shumë rreth sëmundjeve dhe të testojnë vaksinat.

SARS-COV-2, virusi që shkakton COVID-19, është një nga viruset që studiohet këtu.

Shkencëtarët thonë se pandemia është larg fundit, pasi ndërsa vaksinat po arrijnë në disa vende, të tjera vende po përjetojnë rritje të infeksioneve.

Për më tepër, shkencëtarët paralajmërojnë se COVID-19 nuk është pandemia e fundit që bota sheh.

“Në të ardhmen do të ketë pandemi tjera. Është e qartë se gjithçka ka ndryshuar, kjo e fundit ndryshoi mënyrën se si e shohim një pandemi dhe se si duhet të përgatitemi”, thotë Lawrence Young, Profesor i Onkologjisë Molekulare në Shkollën e Mjekësisë në Universitetin Warwick.

Shkencëtarët thonë se COVID-19 i zuri të papërgatitur sepse u bazuan në përvojën e fituar nga sëmundjet SARS dhe MERS, që ishin menaxhuar dhe nuk përbënin kërcënim për shëndetin në gjithë botën.

“Ne të gjithë u zhytëm në një ndjenjë false të sigurisë nisur nga fakti se sëmundjet SARS dhe MERS përhapeshin nga njerëzit që kishin simptoma dhe ajo që ne nuk prisnin ishte shfaqja e një koronavirusi të ri që muind të përhapet nga individë të cilët nuk e dine se janë infektuar. Pra përhapja e virusit nga njerëz pa simptona, diçka e ndryshme që na zuri në befasi dhe të gjithë ishim pak naivë”, thotë AI.

Ndërsa spitalet përballen me shtim të numrit të pacientëve, në botë po hartohen plane për shmangjen e një infeksioni tjetër të kësaj natyre.

“Duhet të shfrytëzojmë aftësinë tonë të grumbullimit dhe vlerësimit në kohë reale të të dhënave për patogjenë . Duhet të bëjmë shumë më shumë të kuptojmë se cilat specie mund të shkaktojnë probleme për ne”, thotë Danny Altmann, Profesor në Kolegjin Imperial të Londrës.

Çdo vit Organizata Botërore e Shëndetësisë harton një listë me patogjenët që kërcënojnë më shumë njerëzimin.

Para vitit 2020 ethet hemorragjike dhe Ebola kryesonin këtë plan./voa

Nga: Gazeta Sot