4 Prill 2025

… Partitë politike hakeruan institucionet për të përftuar materiale me qëllim goditjen e kundërshtarëve.

Në një intervistë për Euronews, Spartak Braho trajtoi një temë të ndjeshme: hakimin e institucioneve nga partitë politike, pas rastit të djeshëm në kompjuterat e SPAK.

Ai shpreh shqetësimin se ky fenomen është një sulm i drejtpërdrejtë ndaj shtyllave të shtetit dhe drejtësisë. Braho argumenton se hakimi i SPAK-ut dhe institucioneve të tjera ka për qëllim të minojë besimin e publikut dhe të pengojë funksionimin e drejtësisë së pavarur.

Ai thekson se këto veprime nuk janë vetëm të paligjshme, por edhe të dëmshme për stabilitetin politik dhe institucional të vendit. Sipas tij, partitë politike që ndërmarrin këto sulme kanë interesa të ngushta dhe synojnë të mbrojnë individë të përfshirë në korrupsion apo krime të tjera.

Braho nënvizon rëndësinë e mbështetjes ndërkombëtare për SPAK-un dhe institucionet e drejtësisë, duke përmendur rolin e Departamentit Amerikan të Shtetit dhe Bashkimit Europian në krijimin dhe konsolidimin e këtyre strukturave. Ai apelon për një mbështetje të gjithanshme nga qytetarët dhe institucionet vendase për të ruajtur pavarësinë e drejtësisë dhe për të luftuar pandëshkueshmërinë.

“Siguria është cenuar rëndë. Hakimi në vetvete konsiderohet vepër penale dhe dënohet nga ligji. Kryhet nga disa aktorë, ku ndër më kryesorët janë shtetet që veprojnë nëpërmjet agjencive të tyre, si dhe institucionet përkatëse të vendeve të tjera, siç ndodhi me Iranin që hakeroi AKSHI-n, përmes agjencive zbuluese.

Një kategori tjetër janë partitë politike. Partitë politike hakeruan institucionet për të përftuar materiale me qëllim goditjen e kundërshtarëve.

SPAK-u, që prej krijimit, është mbështetur nga institucionet ndërkombëtare, si Departamenti Amerikan i Shtetit dhe Bashkimi Europian, me synim të luftohet pandëshkueshmëria që ka shkatërruar vendin. Drejtësia është një shtyllë e rëndësishme e shtetit dhe duhet të qëndrojë e pavarur, larg varësisë politike.

SPAK-u ka marrë disa vite për t’u konsoliduar dhe është bërë një rreze shprese për qeverisjen e këtij vendi. Megjithatë, suksesi i tij varet nga mbështetja e gjithanshme për një drejtësi të fortë, e cila është thelbësore për Shqipërinë që të bëhet një shtet i qëndrueshëm”, tha Braho.