Takimi me Erdogan. Gazetarja e TV5Monde-Ramës: – A po forcohet interesi për Turqinë në dëm të BE? Kryeministri: – Kjo është bla-bla-bla sepse…
Takimi me Erdogan. Gazetarja e TV5Monde-Ramës: – A po forcohet interesi për Turqinë në dëm të BE? Kryeministri: – Kjo është bla-bla-bla sepse…
25 shtator 2021
Gjatë intervistës në telvizionin francez TV5Monde kryeministri Rama u pyet nëse është Turqia e Erdoganit një alternativë tjetër për Shqipërinë në dëm të Bashkimit Evropian.
Kryeministri Rama tha se këto janë “bla-bla-bla” sepse Turqia është një vend mik me të cilin Shqipëria ka një partneritet strategjik.
PJESË NGA INTERVISTA
Pyetje: U bënë vite që prisni? A është frustruese? Në ç’pikë janë negociatat me Brukselin?
Edi Rama: Të themi të vërtetën, nuk është frustruese, sepse e kuptojmë që vetë Evropa është e frustruar nga problemet e saj të brendshme.
Prej krizës së refugjatëve të 2015, po ndodhin shumë gjëra në nivelin evropian, të cilat bëjnë që Bashkimi Evropian të mos arrijë të funksionojë në të gjitha frontet dhe as të menaxhojë nacionalizmat që po lulëzojnë në shumë vende. Edhe pse ekstremi i djathtë për fat të mirë nuk është në pushtet në asnjë vend evropian, qasjet e ekstremit të djathtë ndikojnë sidoqoftë mbi qëndrimet e qeverive të moderuara, e të vetë Bashkimit Evropian. Në këtë pikë, jemi të qartë, ne duhet të bëjmë gjithçka duhet për t’u bërë një vend evropian, për t’u bërë një vend i BE, për t’u bërë një vend i shtetit të së drejtës, sepse e bëjmë këtë për fëmijët tanë. Nuk e bëjmë sepse është dikush në Bruksel, në Paris, apo në Berlin që na e kërkon dhe kjo është rruga e vetme, nuk ka alternativë tjetër. Ne jemi vërtet krenarë që të vazhdojmë në këtë udhë, ka pengesa por s’ke ç’i bën, ne vazhdojmë.
Pyetje: Ndoshta ka alternativa të tjera? Ju keni takuar këtë javë presidentin turk Rexhep Tahip Erdogan në Nju Jork. A po forcohet interesi për Turqinë, në dëm të Bashkimit Evropian?
Edi Rama: Jo. Kjo është bla-bla-bla, në përgjithësi, sepse Turqia është një vend mik i Shqipërisë prej një kohe shumë të gjatë. Me Turqinë, Greqinë dhe Italinë ne kemi një partneritet strategjik dhe miqësia me Turqinë dhe marrëdhëniet me Turqinë nuk janë një alternativë ndaj Bashkimit Evropian. Aspak.
Gazeta Panorama