Nuk është hera e parë që shkrirja e akullit nxjerr në dritë objekte dhe kafshë të së shkuarës. Kjo ka ndodhur me trupin e një ariu që jetonte gjatë Pleistocenit dhe me kokën e një ujku mbi 40 mijë vjet më parë. Por tani akulli i shkrirë në një zonë të quajtur Horse Ice Patch, pranë Oppland në Norvegji, ka zbuluar një sandale të veshur nga një burrë që sipas hipotezave të studiuesve ka jetuar 1700 vjet më parë.

Këpuca, tipike e modës romake të kohës, i lejoi arkeologët e Secrets of the Ice (një grup shkencëtarësh të specializuar në gjetjet e akullit) të zbulonin detaje të reja mbi të ashtuquajturën Epokë të Hekurit Romak (1-400 vjet pas Krishtit), epokë në të cilën rajonet e Evropës veriore u ndikuan nga përdorimet dhe zakonet e Perandorisë Romake.

Sipas asaj që u zbulua nga të dhënat e radiokarbonit, sandalja prej lëkure u braktis në mes të udhëtimit nga pronari i saj, sepse ishte e konsumuar. Ishte një variant i sandales së famshme romake, një këpucë pa taban e përbërë nga një copë e vetme lëkure të papërpunuar.

“Është mjaft befasuese të gjesh një sandale të stilit romak pothuajse në 2000 metra lartësi”, thotë për Science Norway arkeologu Espen Finstad, që së bashku me ekipin e tij e gjetën sandalen.

Lendbreen, vendi pranë të cilit u gjet sandalja, ishte një zonë e populluar gjatë epokës së vikingëve, rreth vitit 1000 pas Krishtit.

“Ishte një periudhë e lëvizjes së madhe: filluan shkëmbimet e para tregtare midis Skandinavisë dhe Evropës”, shpjegon James Barrett, një arkeolog në universitetin e Kembrixhit. Vendi i saktë i zbulimit, zona e akullit të kuajve, në 2000 metra lartësi ishte një vend lidhjeje midis brendësisë norvegjeze dhe bregdetit.

“Njerëzit që mbërritën këtu duhet të kenë pasur interesa, ndoshta komerciale”, shpjegon Finstad, “ata u zhvendosën drejt bregut për të shitur brirë, lëkura kafshësh dhe lëkurë, dhe u kthyen në brendësi me kripë dhe mallra të tjera”.

Sipas ekspertëve të Secrets of the Ice, këto zbulimet janë vetëm fillimi.

Gazeta Dita